الاختبار الاول…يا سلملم

السلام عليكم…

اليوم هو الاربعاء الموافق 622008م ، كان عندي امتحان لغة انجليزية مدتة ساعتين، و الكارثة اني رايح على الامتحان وانا الحمد لله مش دارس الا اول 5 اوراق من الكتاب ، وعنجد حسيت بخوف لكن في نفس الوقت كنت مبسوط ومرتاح،شعورين مختلطين في بعض،لكن الحمد لله جاءت الامور متل ما بدي ، فكان الامتحان سهل جدا وما فيه تركيز على القواعد ابدً والامتحان مكون من 40 سؤال ،انا متاكد اني جاوبت على 35 سؤال على الاقل اجابات صحيحة ،و هاد الامتحان راح الحمد لله ومضى على خير ، وبكرة الخميس 722008م، عندي امتحان “تراكيب متقطعة-Discrete Mathematics and its application” وهو اصعب مادة ادرسها في هذا الفصل لانو الحمد لله ،دكتور المادة ولا حبة،يعني من الاخر ما بيعرف الفرق،بين البندورة وبين السلطة، يعني”الله يعوض”،والطلاب رغم هيك بحاولوا يفهموا منيح ويركزوا ويساعدوا بعض على قدر الامكان ، وتجميعي في المادة حتى الان”بدون الامتحان النهائي” هو 34 من 50 ،،،صح انو مش منيح ، لكن الظروف حكمت يصير هيك،وهي اكثر مادة انا خايف منها،و اللي بضحك رغم اني خايف منها الا انو انا مرتاح نفسياً ومش حاسس بأي ضغط ولا شيئ،لاني كما هو معروف عني باخد الاشياء ببساااااااااطة كبيرة وما بعقدها ، وان شاء الله يكون بكرة يوم فرح وسعادة و انبساط وراحة”حاسس حالي مكيف” على الجميع، الله يخليكوا ادعولي انجح بكرة و ازبط منيح لانو امتحاني الساعة 9 حتى الساعة 11 ، يعني من الصبح بدري ومش رح الحق اسال صحابي اذا مش فاهم شيئ ،،، وكمان اليوم عندنا “بارتي” دراسة انا وحبي محمود”Cozmo” واللوح واللي كمان انا بحبه اللي هو نور الدين”ابو صلاح”،،، وما بقول الا الله يعدي هالليلة وبكرة على خير.

اميييييييييييييييييييييييييييييييييييييييييييييييييييييييييييييييين يا رب العالمين